Um felagið

Autismufelagið er eitt áhugafelag fyri tey við autismu og teirra avvarðandi.  

Nevndararbeiðið og arbeiðið í felagnum er í høvuðsheitum sjálvboðið.

Autismufelagið er eitt av feløgunum í MEGD

Endamál

• at kunna um autismu og teir trupulleikar, brekið viðførir
• at vera almenna røddin fyri fólk við autismu mótvegis samfelagnum og myndugleikunum
• at virka fyri at sett verða á stovn neyðug tilboð og stovnar, so tilvera teirra gerst trygg
• at fylgja við vitan innan autismuøkið
• at skapa samband millum avvarðandi at fólki við autismu

Limatal

Tað eru á leið 400 limir í felagnum í løtuni. Hesi eru foreldur, onnur avvarðandi, fakfólk, stovnar, feløg og skúlar.

Tiltøk

Felagið skipar vanliga fyri hesum tiltøkum:

• Foreldramorgunmatur
  Umleið 4 ferðir um árið hittast vit til ein morgunmat og tosa saman um okkara felags áhugamál. Vanliga eru vit 20-30 fólk, mest foreldur, verjar og onnur, ið varða av.
  Hetta er eitt limatiltak.
• Autismukafe
  Átta til tíggju ferðir um árið er autismukafe fyri vaksin við autismu, har prátað verður um ymisk evni, ið ávirka gerandisdagin, so sum áhugamál, arbeiði og familjulív.
• Grilldagur
  Eina ferð um árið hava vit ein grilldag fyri limir við og uttan familju.
• Jólahald
  Árliga jólahaldið er fyri limir við familju.
• Fyrilestrar og skeið
  Umframt hetta skipar felagið javnan fyri ymsum fyrilestrum og skeiðum.
• Autismuvegleiðing
  Felagið hevur saman við ADHD-felagnum eina vegleiðing, har limir kunnu ráðføra seg um rættandi og truplar spurningar.